চলন্ত অ’টোত ছাত্ৰীৰ শ্লীলতাহানিৰ চেষ্টা চলোৱা অ’টো চালকৰ

শিলচৰত অ’টো চালকৰ বিৰুদ্ধে অসম বিশ্ববিদ্যালয়ৰ এগৰাকী ছাত্ৰীৰ শ্লীলতাহানিৰ চেষ্টা চলোৱাৰ অভিযোগ উত্থাপিত হৈছে । বিশ্ববিদ্যালয়ৰ ছাত্ৰ-ছাত্ৰীসকলে এই ঘটনাৰ পিচতেই নিৰাপত্তাক লৈ চৰকাৰ তথা প্ৰশাসনৰ বিৰুদ্ধে ক্ষোভ প্ৰকাশ কৰিছে ।উত্থাপিত অভিযোগ অনুসৰি যোৱা ১৯ আগষ্টৰ সন্ধিয়া বিশ্ববিদ্যালয়ৰ পৰা এগৰাকী ছাত্ৰীয়ে অ’টোৰে ভাড়াঘৰলৈ যোৱাৰ সময়তেই এই ঘটনাটো সংঘটিত হয় । অটো চালকজনে ছাত্ৰীগৰাকীক অ’টোৰ পিছৰ ছিটত বহিবলৈ নিদি সম্মুখৰ ছিটটোত অৰ্থাৎ চালকৰ কাষত বহুৱাই লয় । অ’টোখন কিছুদূৰ যোৱাৰ পাছত চালকজনে ছাত্ৰীগৰাকীৰ লগত অভব্য আচৰণ আৰম্ভ কৰে ৷ আনকি ছাত্ৰীগৰাকীক লম্পট চালকেজনে পেণ্টৰ চেইন খুলি গোপনাংগ দেখুৱাবলৈ আৰম্ভ কৰে । চালকজনে এনে অশ্লীল আচৰণ কৰাত কোনোমতে অ’টোৰ পৰা নামি পলাই যায় ছাত্ৰীগৰাকীয়ে ।”

ছাত্ৰীগৰাকীৰ শ্লীলতাহানিৰ চেষ্টা চলোৱা সন্দৰ্ভত বিশ্ববিদ্যালয়খনৰ এজন ছাত্ৰই মত প্ৰকাশ কৰে যে”যি সয়ময়ত দেশত নাৰী সুৰক্ষাৰ দাবীত প্ৰতিবাদ চলি আছে সেই সময়ত শিলচৰত অসম বিশ্ববিদ্যালয়ৰ এগৰাকী ছাত্ৰীৰ লগত সংঘটিত হৈছে এই ভয়ংকৰ ঘটনাটো । বিশ্ববিদ্যালয়ৰ পৰা অ’টোৰে নিজৰ ভাড়াঘৰলৈ যাওতেই অ’টোৰ ভিতৰত ছাত্ৰীগৰাকীৰ শ্লীলতাহানিৰ চেষ্টা চলায় চালকে ।

এই ঘটনাৰ পাছত ভুক্তভোগী ছাত্ৰীগৰাকীয়ে সমগ্ৰ ঘটনা বৰ্ণনা কৰি অসম বিশ্ববিদ্যালয় আৰক্ষী চকীত এক গোচৰ ৰুজু কৰে । ইপিনে, এই ঘটনাৰ পাছত শিলচৰস্থিত অসম বিশ্ববিদ্যালয়ৰ ছাত্ৰ-ছাত্ৰীসকলে লম্পট চালকক বিচাৰি অভিযান আৰম্ভ কৰে । যোৱা নিশা বিশ্ববিদ্যালয়ৰ ছাত্ৰ-ছাত্ৰীসকলে বদৰুজামান ফাৰুক নামৰ লম্পত টোক আটক কৰি আৰক্ষীক গতাই দিয়ে । ধৃত চালকজনৰ ঘৰ কাছাৰৰ বাকিৰনগৰত ।