ডাম্পাৰৰ ড্ৰাইভিং চীটত বহিল বিনীতা।

সাধাৰণ হৈও এগৰাকী অসাধাৰণ মহিলা বিনীতা বড়ো।
আত্মসংস্থাপনৰ বাবে ল’লে এক সাহসিক পথ।
বহু তথাকথিত ‘নিবনুৱা’ৰ বাবে তেওঁ এক নিদৰ্শন।

এইগৰাকী উদ্যমী নাৰী নাম বিনীতা বড়ো, ঘৰ বাস্কা জিলাত । বড়ো জনগোষ্ঠীৰ এই সাহসী, উদ্যমী যুৱতীগৰাকীৰ কৰ্মস্পৃহাই লাজত পেলাব বহু তথাকথিত নিবনুৱাক । বিনীতাই হাতে-কাজে প্ৰমাণ কৰি দেখুৱাইছে
চাকৰি নহয়, আত্মসংস্থাপনৰ প্ৰকৃত পথ Entrepreneurship ।

অইন বহু যুৱতী মহিলাৰ দৰে বিনীতাইও কোনো চৰকাৰী চাকৰিৰ পিছত দৌৰিব পাৰিলেহেতেন। কিন্তু, আনে যোৱা বাটে যাব নিবিচৰা বিনীতাই সংস্থাপনৰ বাবে ল’লে সচৰাচৰ যুৱতী-মহিলাই সাহস নকৰা এটা পেচা ।

ডাম্পাৰৰ ড্ৰাইভিং চীটত বহিল বিনীতা।
চাকৰিৰ পৰিৱৰ্তে উদ্যমী বিনীতাই ল’লে ডাম্পাৰৰ ব্যৱসায়ৰৰ সিদ্ধান্ত। নিজেও শিকিলে ডাম্পাৰ চলাবলৈ । আৰু কম সময়ৰ ভিতৰতে দুখনকৈ ডাম্পাৰৰ স্বত্বাধিকাৰী হ’ল বিনীতা । যি সময়ত ডাম্পাৰ দেখিলেই মানুহে কোচ-মোচ খাই, সেইসময়ত বিনীতাই এগৰাকী যুৱতী হৈ ডাম্পাৰ চলাই, ডাম্পাৰৰ সফল ব্যৱসায় কৰি দেখুৱাই দিলে – নাৰী কোনো গুণে কম নহয় । যদিহে জীৱনত কিবা এটা কৰাৰ দুৰ্বাৰ বাসনা মনত থাকে, তেন্তে কোনো বাধাই বাধা হ’ব নোৱাৰে । হেভী ডিউটি ভেহিকল ব্যৱসায়ক পেচা হিচাপে বাচি লোৱা বিনীতাই নিকট ভৱিষ্যতত জেচিবি, ফকলেং আদিৰ দৰে আৰ্থ মুভিং হেভী ভেহিকল ক্ৰয় কৰাৰ সপোন পুহি ৰাখিছে । এই সাহসী, উদ্যমী যুৱতীগৰাকীৰ সকলো সপোন পূৰ্ণ হ‌ওক ।