পশ্চিমবংগৰ প্ৰাক্তন মুখ্যমন্ত্ৰী বুদ্ধদেৱ ভট্টাচাৰ্যৰ বিয়োগ

পশ্চিমবংগৰ প্ৰাক্তন মুখ্যমন্ত্ৰী বুদ্ধদেৱ ভট্টাচাৰ্য আৰু নাই। ৮০ বছৰ বয়সত শেষ নিশ্বাস ত্যাগ কৰিলে নেতাগৰাকীয়ে। ২০০০ চনৰ পৰা ২০১১ চনলৈ বংগৰ মুখ্যমন্ত্ৰী হিচাপে দায়িত্বত থকা নেতাগৰাকীৰ মৃত্যুত  গভীৰ শোকৰ ছাঁ পৰিছে।

চি পি আই এমৰ বৰ্ষীয়ান নেতাগৰাকী দীৰ্ঘদিন ধৰি বাৰ্ধক্যজনিত ৰোগত আক্ৰান্ত হৈ আছিল। এই বাৰ্ধক্যজনিত কাৰণতে বৃহস্পতিবাৰে পুৱা কলকাতাত মৃত্যু হয়। চি পি আই এমে তেওঁৰ মৃত্যু পুৱা ৮-৩০ বজাত হোৱা বুলি সদৰি কৰিছে।

জানিব পৰা মতে ভট্টাচাৰ্য নিউমোনিয়াত আক্ৰান্ত আছিল। হাওঁফাওঁ আৰু শ্বাসনালীৰ গুৰুতৰ সংক্ৰমণ ধৰা পৰিছিল তেওঁৰ দেহত। দীৰ্ঘদিন ধৰি ক্ৰনিক অব্ষ্ট্ৰাক্টিভ পালমোনাৰী ডিজিজ  ৰোগতো আক্ৰান্ত আছিল তেওঁ। উল্লেখ্য যে, ২০০০ চনত প্ৰথমবাৰৰ বাবে পশ্চিমবংগৰ মুখ্যমন্ত্ৰী হিচাপে দায়িত্ব লৈছিল বুদ্ধদেৱ ভট্টাচাৰ্যই। ইয়াৰ পিছত তেওঁ ১১ বছৰ ধৰি ৰাজ্যখনৰ মুখ্যমন্ত্ৰী হিচাপে দায়িত্বত আছিল।

যোৱা কেইটামান বছৰত তেওঁ সামাজিক অনুষ্ঠানৰ পৰা আঁতৰি আছিল আৰু দক্ষিণ কলকাতাত থকা চৰকাৰী এপাৰ্টমেণ্টৰ  ঘৰতেই বাস কৰি আছিল।